“Dante dì” nel giorno della celebrazione, la lettura di una composizione originale del professore baianese Carmine Montella

          Justo a metà dô viaggio dâ vita nosta

      me truvaje pe nu vuosco scuro
  3  pecchè ‘a via iusta s’era perza.

          Ahi quanto a dicere comm’era è cosa tosta
      chisto vuosco sarvateco e scuonceco  e terrìbbele

  6  ca sulo a ce penzà me torna ‘a paura!

          Tanto è amaro ca poco ‘e chiù è ‘a morte;
      ma pe parlà dô buono ca io ve truvaje,
  9  dirò ‘e chell’ati cose ca io ve verette.

          Io nu saccio dicere buono comm’ io ve trasette,
       tant’ero chino ‘e suonno a chillu punto
 12  quanno ‘a via bbona lassaje.

          Ma doppo ca io fuje ô pere ‘e na cullina arrivato,
       là addò feneva chella vallata
 15  ca m’aveva ‘e paura ‘o core ncujetato,
          guardaje ncimma, e verette ‘e spalle soje
       vestute già dê raje dô sole
 18  ca accumpagna  pâ iusta via ‘a gente pe ogne cammino.

          Allora fuje ‘a paura nu poco cujeta
       ca nfunno ‘o core m’era cuntinuata
 21  ‘a notte ca io passaje cu tantu sparpetuo.

          E comme a chillo che cô sciato affannuso

       asciuto fore dô mare ncopp’ ‘a spiaggia
 24  se vota a guardà l’acqua periculosa,
          accussì l’animo mio, ca fujeva ancora,
       se vutaje arreto a vedè n’ata vota ‘o passo
 27  ca nu lassaje maje n’ommo vivo.
          Doppo che io avette arrepusato nu poco ‘o cuorpo stracquo,

       repigliaje ‘o cammino pâ pennenza sulagna,
 30  sì ca ‘o pere fisso sempe era ‘o chiù vascio.

          All’intrasatta, quase quanno accummencia ‘a sagliuta,
       na lonza liggera e veloce assaje,
 33  ca ‘e pilo nguacchiato era cummigliata;
          e nun se ne ieva ‘a nanze  a ll’uocchie,
       anze cuntrastava tanto ‘a via mia,
 36  ca io steve pe turnà chiù vote arreto.
          Ero ‘o tiempo ‘e l’inizio dâ matina,
       e ‘o sole saglieva cu chelli stelle
 39  ca èreno cu isso quanno l’ammore divino
          criaje chelli cose belle;
       accussì ca a sperà buono me dava mutivo
 42  ‘e chella bestia câ pelle macchiata
          l’ora dô tiempo e ‘a staggione doce;
       ma nu tanto ca nu me facesse paura
 45  ‘a vista ‘e nu lione  ca io vedette.
          Chisto pareva ca contro a me venesse
       câ testa aizata e cu na famme arraggiata,
 48  tanto ca pareva ca l’aria tremmasse.
          E na lupa, ca ‘e tutte ‘e desiderie
       pareva chiena pure si era secca secca,
 51  e tanta gente facette già vivere pezzente,
          chesta me dette tanta malepatenza
       câ paura ca asceva dâ  vista soja,
 54  ca io perdette ‘a speranza ‘e arrivà ncoppa.

          E comme è chillo che accatta cuntento,
       e arriva ‘o tiempo ca ‘o fa perdere,
 57  ca  in tutte ‘e penziere suoje chiagne e s’addulura;
          accussì  me facette ‘a bestia senza pace,
       ca, venennome contro, a poco a poco
 60  me faceva ì là addò ‘o sole nun ce stà.

          Ntramente ca io sciuliavo abbascio,
       annanze a ll’uocchie mieje accumparette
 63  uno ca pe nu silenzio luongo pareva comme a n’ombra.
          Quanno io vedette chisto into a chillo grande posto sulagno,

       «Agge pietà ‘e me», alluccaje a isso,
 66  «chiunque tu sì, o n’ombra o n’ommo vero!»
          Me risponnette: «No ommo, ommo già fuje,
       e ‘e pariente mieje fujeno lombarde,
 69  tutte ‘e duje nascettero a Mantova.

          Io nascette sotto a Giulio, anche se fuje tarde,
       e campaje a Roma sotto a lo buon Augusto
 72  ô tiempo dê divinità fauze e  busciarde.

          Poeta fuje, e cantaje ‘e chillo galantommo
       figliulo d’Anchise ca venette da Troia,
 75  doppo che Ilio maistoso fuje appicciato.

          Ma tu pecchè tuorne n’ata vota a tantu sparpetuo?
       Pecchè nu saglie chella bella muntagna 

 78  che è  principio  e causa ‘e ogne felicità?»

          «Allora sì tu chillo Virgilio e chella surgente
       che  spanne ‘e parlà nu sciummo accusì lario?»
 81  risponnett’ io a isso cu ‘a fronte scurnusa.

          «O ‘e l’ati poete annore e luce
       me aiuteno  ‘o sturio luongo e l’ammore gruosso

 84  che m’ha fatto cercà ‘e libbre tuoje.

          Tu sì ‘o masto mio e ‘o scrittore mio;
       tu sì chill’unico ‘a do io levaje

 87  ‘o stile bello che m’ha dato grolia.

          ‘A vire ‘a bestia che me facette girà:
       aiutame da essa, famoso saggio,

 90  ch’essa me fa tremmà ‘e vene e ‘e puze.»

          «Tu he ‘a fà n’atu viaggio»,
       rispunnette doppo che chiagnere me vedette,

 93  «si vuò ascì vivo ‘a chisto posto furesteco:

          pecché sta bestia, che pe causa soja tu allucche,
       nu lascia passà nesciuno pâ via soja,
 96  ma tanto ‘o cuntrasta nfino a che  l’accide;

          e tene ‘a natura accussì fetente e malamente,
       che maje nu régne ‘o gulìo  speruto,
 99  e doppo mangiato tene chiù famme ‘e primma.

          Assaje sò l’animale che se piglia pe mugliera.
       e chiù sarranno ancora, fino a quanno ‘o veltro
102  venarrà, che ‘a farrà murì cu dulure.

          Chisto nun se mangiarrà terra né denare,
       ma cunuscenza, ammore e virtù,
105  e ‘a nasceta soja sarrà tra feltro e feltro.

          ‘E chella povera Italia sarrà sarvamiento
       ca pe essa murette ‘a zitella Camilla,

108  Eurialo e Turno e Nisso ‘e ferite.

          Chisto le darrà ‘a caccia pe ogne città,
       nfino a che l’avarrà mannata into a l’inferno,
111  là ‘a do l‘ammiria  primma ‘a facette ascì.

          Perciò pô bene tujo penzo e capisco
       ca tu viene appriesso a me, e io sarraggio ‘a guida toja,
114  e te tirarraggio ‘a cà pe nu posto eterno,
          addò sentarraje l’allucche disperate,

       vedarraje ‘e viecchie spirete allamentuse,

117  che â seconna morte ognuno allucca;
         e vedarraje chilli ca sò allere
       int’ ‘o fuoco, pecché spereno ‘e venì,

120  quanno sarrà, addu ‘e gente beate.

          Addu loro po si tu vularraje sagliere,
       anema  ce sarrà pe chesto chiù ‘e me degna:

123  cu essa te lassarraggio quanno io partarraggio;

          pecché chillu Masto che là ncoppa cumanna,
       pecché io fuje cuntrario â legge soja,

126  nu vò che int’ â città soja io traso.

          Int’ a tutte ‘e poste cumanna e  là mastrea;
       là è ‘a città soja e l’auta seggia:

129  oh felice chillo che là vene chiammato!»

         E io a isso: «Poeta,  io t’addimmanno ancora
       pe chillo Dio che tu nu cunusciste,

132  pe me fà fuggì chistu male e l’ati pegge,
          che tu m’accumpagne là addò mo diciste,
       pe me fa vedè  ‘a porta ‘e san Pietro

135  e chilli che tu faje accussì afflitte».

          Allora se movette, e io jette appriesso a isso.